Хажимурат Коркмазов тууралуу 5 факты

БИШКЕК, 30-май — Sputnik. Жогорку Кеңештин мурунку депутаты Хажимурат Коркмазов убактылуу кармоочу жайдан бошотулду. Бул тууралуу Sputnik Кыргызстан агенттигине анын адвокаты Кайрат Загибаев билдирди. 

Эске сала кетсек, 24-майда Бишкек шаардык сотунда Данияр Нарымбаев менен Хажимурат Коркмазовдун иши каралып, соттук коллегия Биринчи Май райондук сотунун чечимин күчүндө калтырган. 

Ага ылайык, Нарымбаев үч жылга, Коркмазов 1,5 жылга эркинен ажыратылган. Коркмазов 10 айдан бери убактылуу кармоочу жайда отургандыктан, жаза мөөнөтү бүттү деп эсептелинет. Анткени убактылуу кармоочу жайдагы бир күн эки күнгө тете саналат. 

Коркмазов былтыр Нариман Түлеевдин кызы Назгүл Түлеевадан 100 миң доллар пара алып жаткан жеринен кармалган.

Sputnik Кыргызстан агенттиги Хажимурат Коркмазов тууралуу 5 фактыны сунуштайт. 

1. Жогорку Кеңештин беш жолку депутаты. 1995-жылдан 2015-жылга чейин эл өкүлү болуп иштеген. 1998-2000-жылдары Мыйзам чыгаруу жыйынынын Соттук-укуктук реформа боюнча комитетин жетектесе, 2006 – 2007-жылдары Укук тартиби жана коррупцияга каршы күрөшүү боюнча комитетин жетектеген.

2. Милициянын генерал-майору деген наамы бар. 

3. Жогорку Кеңештин бешинчи чакырылышында "Ата-Журт" партиясынын лидери Камчыбек Ташиев менен кер-мур айтышып жакалаша кеткен. Анда "Ата-Журттун" депутаттары Коркмазовду улуттар аралык араздашууга жем таштаган деп күнөөлөшкөн. Ага чейин Коркмазов партиялаштарына улутчулдар деген айып койгон. Кийинчерээк Хажимурат Коркмазов, Роман Шин жана Нарынбек Молдобаевдер "Ата-Журт" партиясынын чыгып кетишкен. 

4. "Күжүрмөн кызмат өтөгөндүгү үчүн" I даражадагы медалы (2001-ж.) менен сыйланган. Мамлекеттик кызматтын II класстагы мамлекеттик кеңешчиси.

5. Улуту карачай болсо да Коркмазов кыргыздын түшүн жоруйт.