БИШКЕК, 28-май – Sputnik. Спексин гормонунун жетишсиздиги балдардын семирип кетишине алып келет. Себеби аталган гормон денедеги май клеткалары менен молекулалардын азайышына түрткү болот. Бул тууралуу Journal of Clinical Endocrinology & Metabolism журналына шилтеме берүү менен РИА Новости жазып чыкты.
"Биз бул гормондун өзгөрүшүн биринчи жолу изилдеп чыктык. Башка изилдөөлөр чоң адамдар арасында спексин гормонунун жетишсиздиги семирүүгө алып келерин көрсөткөн. Бирок биздин байкоолор төрөлгөндөн баштап гормондун таасири чоң экенин аныктады", — деп билдирди Рочестер штатындагы (АКШ) Майо клиникасынын адиси Сима Кумар.
Бул ачылыш Кумар менен анын кесиптештеринин кызыгуусун жараткан. Мындан улам алар гормондун өспүрүмдөргө тийгизген таасирин иликтеп көрүүнү чечишкен.
Окумуштуулар жүздөгөн балдардын канын алып байкоо салышкан. Натыйжада организминде спексин гормону аз балдар ашыкча салмактан жабыр тартары белгилүү болду.
