БИШКЕК, 28-май – Sputnik. Казакстандан 8 миң 200 ташбаканы Оренбург облусуна автоунаага салып ташып бара жаткан жарандар кармалып, жаныбарлар артка кайтарылды. Бул туурасында РИА Новости Россиянын ИИМине шилтеме берүү менен билдирди.
Бул жаныбарларга жазылган документтер, тагыраагы, ветеринардык сертификаттар болгон эмес. Аны ташып бара жаткан киши административдик жоопкерчиликке тартылып, айып пул салынган. Таш бакалар Казакстанга кайтарылганга чейин Оренбург мамлекеттик педагогикалык университети менен ыктыярчылардын кароосунда болгон.
"Жаныбарларды берип жатканда Россия ИИМдин Оренбург облусу боюнча башкармалыгы Казакстандын Айыл чарба министрлигине таш бакаларды кайтарылгандан кийин алардын табигый жайына коё берүү боюнча макулдашуу түздү", — деп айтылат маалыматта.
Жаныбарларды кайтарып берүүгө айыл чарба министрлигинин алдындагы тармактык бирикме жоопкер болду.
