БИШКЕК, 26-май — Sputnik. Күзүндө Камбар-Ата-2 ГЭСине экинчи агрегатты орнотуу башталарын Sputnik Кыргызстан агенттигине "Электр станциялар" ишканасы билдирди.
Камбар-Ата-2 ГЭСинин курулушу 1986-жылы башталып, 90-жылдары каражаттын тартыштыгынан улам токтоп калган. Анда бардыгы болуп үч агрегат орнотулуп, ар биринин кубаттуулугу 120 мегаваттка жетет. Курулуш иштери 2007-жылы жанданып, үч жыл өткөндөн кийин алгачкы агрегаты орнотулган.
"Электр станциялары" ААКтын маалыматына ылайык, каржы булагы табылган. Экинчи агрегатты орнотууга 109 миллион доллар кетет.
"План боюнча керектүү иштер ноябрь айында башталат", — деп компаниядан билдиришти.
Экинчи агрегатты ишке киргизгенден кийин аталган ГЭСтин кубаттуулугу 240 мегаваттка чейин көбөйөт. Ал эми үчүнчү агрегат Камбар-Ата-1 ГЭС толук ишке киргизилгенден кийин коюлат.
