БИШКЕК, 24-май — Sputnik. Жалал-Абад облусуна караштуу Базар-Коргон районундагы "Жаркынай" базары 22-май күнү түндө өрттөнүп кеткен. Бул базар райондогу эң чоң базар болуп эсептелет. Тилсиз жоо 2000 чарчы метр жерди жалмаган. Анын кесепетинен 100дөгөн контейнерлер товарлары менен жок болгон. Келтирилген чыгымдарды райондук коргонуу комиссиясы жеринде тактап жатат. Өрттү өчүрүүгө жардам берүү үчүн болжол менен 600-700гө жакын адам чыккан. Жалын түнкү саат үчтөргө жакын толугу менен өчүрүлгөн.
Өзүн Айдай деп тааныштырган алтымышты таяп калган аял базардагы товарлары эки сааттын ичинде күл болуп калганын көзүнө жаш алып айтып берди. Анын айтымында, контейнердеги бир миллион сомдон ашык товары күйүп кеткен. Ал жесир болгондуктан эки баласын өзү багып чоңойткон.
"Мен жалаң аялдардын кийимдерин сатчумун. Базар экинчи эле үйүбүз болуп калгандыктан кыштан калган кийимдерди жана жаңы алып келген товарларды бул жакта сактачумун. Заматта эле бардык дүйнөбүз көз алдыбызда күлгө айланды. Буга чейин базарда уурулук же өрт эч болгон эмес", — дейт ал.
Айдай айым тапкан-тергенинин баарын базардагы соодасына жумшаганын айтып, болгон байлыгы, дүнүйөсү, күнүмдүк тиричилиги дал ушул базарга байланганын кошумчалады.
"Мен Базар-Коргондун борборунда жашайм. Мал кармабайм, керек болсо тоогум да жок. Болгон дүнүйөм ушул базардын ичинде эле. Тиричилигим ушу менен жүрчү. Эми кантип жашайм, билбейм…", — деп көз жашын төктү.
Өрт болорго чейин ал үйүнүн документтерин, кызынын дипломун жана үч небересинин күбөлүгүн көчүрмөдөн өткөрүү үчүн базарга алып келип, аны үйүнө алып кетүүгө жетишпей калганын билдирди. Алоолонуп күйгөн өрт бардык документтерди да жок кылган.
Насыя төлөйбүзбү же жан багабызбы?
"Биз көп жылдан бери соода кылып, алардын ишеничине киргендиктен товарды саткандан кийин акчасын беребиз деп алчубуз. 25-майда алардын акчасын беришибиз керек эле. Эми Бишкектеги жана Кара-Суудагы соодагерлерге эмне дейбиз? Насыябызды кантип төлөйбүз деп арман кылып жатабыз….", — деп оор үшкүрүндү.
Ал ортодо Базар-Коргон айыл өкмөтүнүн башчысы Абдыкадыр Жолчиев жабыркаган сатуучулар менен жолугушуулар болгонун айтып, өрттүн келип чыгуу себебин атайын органдар аныктап жатканын билдирди.
"Азыр өрттүн себебин укук коргоо органдары экотехинспекция менен биргеликте аныктап жатат. Өрт электр зымдарынан чыкканбы же, атайылап өрттөп жиберишкенби аны аныкташат", — дейт ал.
Жолчиев ошондой эле атайын комиссия ким канча чыгым тартканын аныктап жатканын кошумчалады.
Соодагерлердин үстөгү жок насыя талабы
"Базарда соода калгандар чынында талаада калдык. Бизге өкмөт жардам бербесе тиричилик деле кыла албай турган абалдабыз. Андыктан аким менен жолугуп, жардам иретинде үстөксүз насыя алып берүү жагын караштыргыла деп кайрылып жатабыз. Эми алар эмне деп жооп берет, билбейбиз", — дейт базарда соода кылган Айдай.
Белгилей кетсек, буга чейин Баткен облусунун Лейлек районундагы Исфана шаарындагы чоң базар да өрттөнүп кеткен. Анын айынан товарларды кошпогондо келтирилген чыгым дээрлик 4 миллион сомду түзгөн.
