БИШКЕК, 24-май — Sputnik. Республика боюнча оңдоого мүмкүн болбогон 11 объект авариялык абалда турат. Бул тууралуу саламаттык сактоо министри Талантбек Батыралиев премьер-министр Сооронбай Жээнбековдун кабыл алуусунда айтты.
Өкмөттүн маалымат кызматынын билдирүүсүндө иш-чарада калкка медициналык тейлөө көрсөтүүнүн, адистерди даярдоонун жана ооруканаларды оңдоонун сапатын жогорулатуу маселеси талкууланды. Жолугушууга вице-премьер-министр Гүлмира Кудайбердиева катышты.
Өкмөт башчы калкка медициналык көмөк көрсөтүүнүн жеткиликтүүлүгүн жогорулатуу зарылдыгына өзгөчө көңүл бурду.
"Саламаттык сактоо тармагындагы реформалар тыкыр ойлонулуп, коррупциялык көрүнүштөрдү жоюуга, калкка көрсөтүлгөн тейлөөнүн сапатын жогорулатууга багытталышы кажет", — деп белгиледи Жээнбеков.
Министр Батыралиевдин маалыматына ылайык, учурда республика боюнча оңдоого мүмкүн болбогон 11 объект авариялык абалда турат. Буга катар создуктурулган курулуштарга тийиштүү көйгөйлөр бар.
"Республикалык бюджеттеги каражаттын тартыштыгын эске алуу менен, абалдан чыгуунун жолу катары чет элдик инвестицияларды тартуу каралууда", — деди министр.
