БИШКЕК, 23-май — Sputnik. Тажик элинин 94 пайызы Конституцияны өзгөртүү жана Эмомали Рахмондун президеттикке кайра-кайра шайлануусуна уруксат берүү боюнча өткөн референдумда "макул" деген добуш берди. Бул тууралуу Sputnik Тажикстан агенттиги аталган өлкөнүн БШК жетекчиси Бахтияр Худоерзодага таянуу менен жазып чыкты.
Тажикстанды 1992-жылдан тарта башкарып келе жаткан Рахмон азыркы Баш мыйзам боюнча 2020-жылы боло турган шайлоодо президенттикке талапкерлигин коё албайт. Ал эми бул референдум ага мөөнөтүн чектебей президентик шайлоого катышууга укук берет. Мындан сырткары, президенттике талапкерлердин жашы 30 жашка чейин төмөндөтүлүп, диний жана улуттук багыттагы партияларды түзүүгө тыюу салынат.
БШКнын маалыматы боюнча шайлоого 4 миллион 38 миң жаран, же жалпы өлкө боюнча элдин 92 пайызы катышты.
Тажикстандын Конституциясы 1994-жылдын 6-ноябрында кабыл алынган. Баш мыйзамга буга чейин референдум жолу менен эки ирет толуктоо киргизилген. 1999-жылы бир палаталуу парламенттин ордуна эки палаталуусу киргизилген. Ал эми 2003-жылдагы референдум азыркы президент Рахмондун президенттик укугун беш жылдан жети жылга чейин көбөйтүп, андан сырткары 2020-жылга чейин эл башкарып турууга укук берген.
