БИШКЕК, 16-май — Sputnik. Эртең, 17-май күнү Ош шаарынын мэрлигине талапкерлер мамлекеттик тилди билүү боюнча сынак тапшыра турганын Борбордук шайлоо комиссиясы билдирди.
Шарт-талапка ылайык, талапкер өз программасынын негизги жоболорун жазып, 10 мүнөт аралыгында оозеки айтып бериши керек. Мындан тышкары, көркөм окуу өнөрү да сынга коюлмакчы.
Эскерте кетсек, мэрликке Ош шаардык кеңешинин КСДП фракциясынын депутаттары шаардын учурдагы башчысы Айтмамат Кадырбаевдин талапкерлигин көрсөткөн. Ал учурда жалгыз кандидат болуп эсептелет.
Мыйзамга ылайык, талапкерлерди каттоо добуш берүүгө чейин беш жумушчу күн ичинде ишке ашырылат. Буга ылайык, талапкерлердин документтерин кабыл алуу мөөнөтү 17-майда бүтөт.
Ош шаарынын мэрин шайлоо 2016-жылдын 25-майында өткөрүлөт.
