ТУРСУНЗАДЕ, 12-май — Sputnik. Кыргызстан үчүн CASA-1000 долбоорунун зарылдыгы башынан эле айкын болчу. Бул тууралуу премьер-министр Сооронбай Жээнбеков Турсунзаде шаарында салтанаттуу аземде билдирди.
Ал долбоорду ишке ашыруу Борбордук жана Түштүк Азия мамлекеттеринин туруктуу өнүгүүсү үчүн негизги өбөлгө болорун белгилеп, мында Кыргызстан менен Тажикстандын алдында Түштүк жаңы мүмкүнчүлүктөр ачыла турганына токтолду.
"Өз кезегинде Афганистан менен Пакистан социалдык-экономикалык өнүгүүсү үчүн жаңы шарттарга ээ болот. Долбоордун алкагында Кыргызстан менен Тажикстандын гидроэлектрстанциялары тарабынан өндүрүлгөн экологиялык жактан таза продукция экспорттолот", — деди өкмөт башчы.
Жээнбековдун айтымында, Кыргызстан Борбордук Азиядагы суу-энергетикалык ресурстарды комплекстүү пайдаланууну көздөйт.
"Биз долбоорго катышкан мамлекеттердин улуттук кызыкчылыгын көздөө менен өз ара пайдалуу кызматташууну шарттай турган бул долбоордун зарыл экенин башынан эле көрүп билгенбиз", — деди ал.
Долбоор аяктагандан кийин электр энергиясы 470 чакырымдагы жогорку чыңалуудагы линия аркылуу Кыргызстандан Тажикстанга өтөт. Андан ары электр энергиясы Афганистан менен Пакистанга кетет. Долбоордун алкагында 750 чакырым жогорку чыңалуудагы электр линиясы курулат. Ал 2016-2020-жылдары ишке ашат.
