БИШКЕК, 12-май — Sputnik. Алыкул Осмонов атындагы улуттук китепканада "Библиотүн" социалдык-маданий акциясы өткөрүлөт. Бул тууралуу Улуттук китепканадан билдиришти.
Иш-чара тарых жана маданият жылына карата 13-майга белгиленген.
"Библиотүн" акциясында китепкананын эшиги окурмандар үчүн саат 15.00дөн 21.00гө чейин ачык болот. Анда 60тан ашык иш-чаралар өткөрүлүп, үч миңдей жарандын келүүсү күтүлүүдө.
"Акциянын негизги максаты коомчулуктун китепке болгон кызыгуусун арттыруу болуп эсептелет", — деп айтылат маалыматта.
"Библиотүндө" акын, жазуучулар менен адабий кечелер өткөрүлүп, тогуз коргоол оюну, көңүл ачуучу Сармерден программасы жана башка бир катар оюн-зооктор уюштурулат.
