БИШКЕК, 11-май — Sputnik. Кыргызстандын окуучулары химия боюнча L Эл аралык Менделеев олимпиадасында коло медалдарга ээ болушту. Бул тууралуу "Себат" эл аралык билим берүү мекемесинен билдирди.
Маалыматка ылайык, үстүбүздөгү жылдын 2-8 май күндөрү химия сабагы боюнча Москва шаарында L эл аралык Менделеев олимпиадасы болду. Олимпиадага дүйнөнүн 21 өлкөсүнөн 130 окуучу катышкан.
Аталган олимпиадага Кыргызстандан 7 окуучу — Дооронбек Маметов, Азизбек Өзбеков, Саиддин Автандил, Баяман Базарбаев, Ильяс Батырбеков, Абдыкерим уулу Эржигит жана Гүлнур Абдурашидовалар катышты.
2015-жылы өткөн Менделеев олимпиадасына Таластагы "Манас-Ата" лицейинин окуучусу Темирлан Кубаналиев 3-орунга ээ болуп, коло медаль менен сыйланган.
Менделеев олимпиадасынын жеңүүчүлөрү химия предмети боюнча дүйнөлүк International Chemistry Olympiad олимпиадасына жолдомо алышты. Химия предмети боюнча дүйнөлүк олимпиада 2016-жылдын июль айында Грузиянын Тбилиси шаарында өтөт. Кыргызстандын атынан бул олимпиадага төрт окуучу даярданууда.
Эл аралык химия предмети боюнча Менделеев олимпиадасын 1966-жылдан баштап жыл сайын Москва мамлекеттик университети өткөрүп келет.
