БИШКЕК, 2-май — Sputnik. Алматыда 30-апрель күнү казак улуттук медициналык университетинин студенти Санжарбек Арзиев 23 жашын белгилеп жатып жоголуп кеткен. Бул тууралуу Тoday.kz агенттиги жазып чыкты
Санжарбек Кыргызстанда төрөлгөн, кийин казак жарандыгын алган.
"29-апрелден 30-апрелге караган түнү Санжарбектин туулган күнүн кафеде белгилеп жатканбыз. Андан кийин түнкү клубга барууну пландадык. Достор унаада отурган чакта ал сыртка телефон менен сүйлөшүүгө чыгып Весновка дарыясына кулап кетти. Окуя видеокамерага тартылып калган", — деп досу Азамат билдирген.
Sputnik Кыргызстан агенттигине жоголгон баланын эжеси Нуржан издөө иштерине жакын туугандары жана ыктыярчылар болуп 60ка жакын киши тартылганын айтат.
Ал полиция кызматкерлери алгылыктуу аракет жасабаганын белгиледи.
Учурда издөө иштерине Бишкектен келген баланын ата-энеси менен туугандары кошулду.
