Буга чейин интернетте пенсионерлерди акысыз ташып жаткан таксисттин сүрөтү жарыяланган.
"Менин көз алдымда бир таксист пенсионер адамга келип, акысыз жеткирүү сунушун айтты. Тиги макул болуп отурду да, жөнөп кетти. Бул кандайдыр бир акциябы? Же өлкөбүздө жакшы адамдар дагы деле барбы?" — деп суроо салат Ольга Будаева аттуу Facebook тармагынын колдонуучусу.
Sputnik Кыргызстан агенттигинин журналисти сүрөттөгү Ибрагим гана мындай кадамга барбастан, башка ыктыярчылар да бар экенин аныктады.
"Биз такси фирмасындагы кесиптештер менен кеңешип, бош жүргөн убакта улгайган адамдарды акысыз жеткирип турууну чечкенбиз. Кардар жок учурда жөн эле жүргөнчө пайдалуу иш жасаган артык да", — деди Абдужапаров.
Ал чоң ата, чоң энелердин батасын алуу менен маанайы да көтөрүлөрүн кошумчалады.
