БИШКЕК, 1-май. — Sputnik. Жогорку Кеңештин спикери Чыныбай Турсунбеков кыргыз элин 1-май эмгекчилердин эл аралык тилектештик күнү менен куттуктады.
Төрага өз куттуктоосунда ак эмгеги, маңдай тери менен мамлекеттин өнүгүшүнө салымын кошуп, ыйык мекендин кубаттуулугун арттырып жаткан ар бир жаранга ыраазычылык билдирди.
"Ар бир адамдын өмүрүндө эмгек асыл жана өзгөчө мааниге ээ баалуулук болуп саналат. Эмгектенүү менен гана алдыга койгон ой-максаттарыбызга жете алабыз. Адам өмүрү ак ниет, максаттуу мээнет аркылуу толук кандуу жашоого айланат. Биздин өлкөдө жарандарыбызга бардык тармактарда жемиштүү эмгектенүү аркылуу бакубат жашоого шарт түзүү зарыл", — деп айтылат спикердин куттуктоо сөзүндө.
Турсунбеков Жогорку Кеңеш жарандарды иш менен камсыз кылуу, алардын эмгекке болгон укуктарын сактоонун мыйзамдык базасын чыңдоо боюнча жигердүү аракеттерди көрүп жатканын, бул багыттагы ишмердүүлүк мындан ары да улантыларын кошумчалайт.
"Ар бир адам адал эмгегинин акыбетин, адилет кайтарымын көргөндөй коом түзүү — биздин негизги максатыбыз! Урматтуу мекендештер! Сиздерди эмгек майрамыңыздар менен куттуктап, ишиңиздерге ийгилик жана чың ден соолук, үй-бүлөлүк бакыт каалайм!" — деди Турсунбеков.
Төрага куттуктоосун өз эмгегине канааттанган адам гана өлкөсүнүн сыймыгын арттырып, экономикасынын өнүгүшүнө өз салымын кошо аларын белгиледи.
