БИШКЕК, 26-апр. — Sputnik. Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитети төрагалыкка Чыныбай Турсунбековдун талапкерлигин жактырып, аны парламенттин кароосуна чыгаруу чечимин кабыл алды. Бул тууралуу парламенттин маалымат кызматы билдирет.
Тармактык комитеттин төрагасынын орун басары Алмамбет Шыкмаматов Жогорку Кеӊештин төрагалыгына Чыныбай Турсунбековдун талапкерлиги КСДП, "Ата Мекен", "Республика – Ата-Журт" парламенттик фракциялары тарабынан көрсөтүлүп жатканын билдирди.
Эскерте кетсек, буга чейин Турсунбековдун талапкерлигин "Республика — Ата-Журт" фракциясы да жактырып, ал эми "Ата Мекен" КСДП кимди көрсөтсө ошол адамдын талапкерлигин колдой турганын билдирген.
Буга чейин спикерликке талапкерлигин койгон Канат Исаев менен Бакыт Төрөбаев шайлоодо 51ден добуш алып, жарыштан четтеп калган.
