БИШКЕК, 21-апр. — Sputnik. Жогорку Кеңештин депутаты Нурлан Момбеков АКШнын мамлекеттик департаментинин адам укугу боюнча жасалган докладындагы Кыргызстан боюнча айтылган маалыматтарга парламент жооп айтуусу керектигин айтып чыкты.
Эскерте кетсек, мамдепартамент 14-апрель күнү дүйнө жүзүндөгү адам укугу жаатындагы кырдаал боюнча доклад даярдап, анын 36 бети Кыргызстанга арналган. АКШ документте Кыргызстанда "мыйзамсыз камакка алуу", "бийлик менен макул болбогондорду четтетүү", Азимжан Аскаровдун "укугун бузуу", "кызмат адамдарына жаза көрүлбөй турганы", "бейөкмөт уюмдарга басым жасоо" өкүм сүрөрү белгиленген.
"АКШнын сынына "а" же "б" деп койсок болбойбу? Бир адамды талатып коюп, үн катпай отурабыз. Ал ортодо укук коргоочулар Кыргызстан менен президент Алмазбек Атамбаевди жаман көрсөтүп салышты. Аскаровго сыйлык бергенде да парламент үн каткан эмеспиз. Шайлоодон башыбыз чыкпай жатат. Азыр да төрагасыз отурабыз", — дейт Момбеков.
Ал буга чейин Роза Отунбаева депутаттарды сынга алганын айтып, өлкөдөгү талуу маселелерди парламент сөзсүз талкуулашы керектигин кошумчалады.
