БИШКЕК, 20-апр. — Sputnik. Журналисттерге дресс-кодду жеңилдетүү керек. Мындай пикирин эл өкүлү Кенжебек Бокоев төрагалыкка талапкерлерге суроо берип жатып билдирди.
Учурда парламентте төраганы шайлоо болуп, анда талапкерлерге суроо берүү уланууда.
Эл өкүлү Кенжебек Бокоев спикерликке талапкер болуп жаткандарга журналисттерге карата дресс-кодду жеңилдетүү керекпи деген суроо салды.
Бакыт Төрөбаев депутаттын пикирине макул экенин билдирди.
"Ооба, журналисттерге карата сөз эркиндиги чектелбеш керек. Бирок, ошол эле учурда журналисттер да парламентти сыйлоосу зарыл", — деди Төрөбаев.
Өз кезегинде талапкерлердин бири Канат Исаев да бул сунушту колдой турганын билдирди.
"Демократиялык өлкөдө сөзсүз түрдө сөз эркиндиги болуусу керек. Андыктан журналисттерге карата кысым жасоо туура эмес", — дейт Исаев.
Эске сала кетсек, өткөн бейшемби күнү парламентте төраганы шайлоо маселеси күн тартибине киргизилип, бирок кворум болбой, спикерди шайлоо кийинки аптага жылган.
Мурдагы төрага Асылбек Жээнбеков агасы премьер-министрликке көрсөтүлгөндүктөн спикерликтен өз эрки менен кеткен.
