Масалиев: көпчүлүк коалиция эки талапкерди тең парламенттин кароосуна алып чыгат

БИШКЕК, 19-апр. — Sputnik. Көпчүлүк коалициясы спикерликке талапкерлердин экөөсүн тең Жогорку Кеңештин кароосуна алып чыгат. Бул тууралуу Sputnik Кыргызстан агенттигине эл өкүлү Исхак Масалиев билдирди.

Бүгүн парламенттин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитетинде аталган маселе каралуусу күтүлүүдө.

"Саат 10.00дө комитеттин жыйыны болот. Бул жерде мыйзамдуулук маселеси каралат. Мага жеткен маалыматтар боюнча көпчүлүк коалициясы эки талапкерди тең парламенттин кароосуна алып чыгат. Буюрса спикер эртең шайланат", — дейт аталган комитеттин мүчөсү. 

Эске сала кетсек, төрагалыкка "Кыргызстан" фракциясы Канат Исаевди, ал эми "Өнүгүү-Прогресс" фракциясы Бакыт Төрөбаевди сунуштаган.

КСДП фракциясынын лидери Чыныбай Турсунбеков буга чейин эки талапкерди өз ара сүйлөшүп алууга чакырганын айткан. Ал КСДП фракциянын учурдагы позициясын ачыктаган эмес. "Ата Мекен" фракциясы төрагалыкка көрсөтүлүп жаткан эки талапкерди тең сунуштоо чечимине келген. 

Эске сала кетсек, өткөн бейшемби күнү парламентте төраганы шайлоо маселеси күн тартибине киргизилген. Ал ортодо "Республика — Ата-Журт" фракциясынын депутаты Максат Сабиров спикерди шайлоону кийинки аптага жылдыруу керектигин беш ирет айтып чыккан. Жыйынтыгында добуш берүүгө болгону 59 депутат келип, кворум болбой, спикерди шайлоо кийинки аптага жылган. Ал ортодо эки талапкер ортосунда кресло талаш кызуу жүрүп жатканы айтылууда. 

Мурдагы төрага Асылбек Жээнбеков агасы премьер-министрликке көрсөтүлгөндүктөн спикерликтен өз эрки менен кеткен.