Турсунбеков: КСДП спикер боюнча позициясын талапкерлерге билдирди

БИШКЕК, 18-апр. — Sputnik. КСДП фракциясы өз позициясын төрагалыкка талапкер болуп жаткандарга билдирди. Бул тууралуу аталган фракциянын лидери Чыныбай Турсунбеков Sputnik Кыргызстан агенттигине кабарлады. 

Эске сала кетсек, төрагалыкка "Кыргызстан" фракциясы Канат Исаевди, ал эми "Өнүгүү-Прогресс" фракциясы Бакыт Төрөбаевди сунуштаган.

"Биз буга чейин маселени жабык эшик артында талкуулап, бир чечимге келгенбиз. Андан соң өз позициябызды талапкерлерге билдирдик. Бүгүн түштөн кийин алар менен жолугуп, жообун угабыз", — дейт Турсунбеков.

Фракция лидери буга чейин эки талапкерди өз ара сүйлөшүп алууга чакырганын айткан. Ал эми факциянын учурдагы позициясын ачыктаган жок. 

Эске сала кетсек, өткөн бейшемби күнү парламентте төраганы шайлоо маселеси күн тартибине киргизилген. Ал ортодо "Республика — Ата-Журт" фракциясынын депутаты Максат Сабиров спикерди шайлоону кийинки аптага жылдыруу керектигин беш ирет айтып чыккан. Жыйынтыгында добуш берүүгө болгону 59 депутат келип, кворум болбой, спикерди шайлоо кийинки аптага жылган. Ал ортодо эки талапкер ортосунда кресло талаш кызуу жүрүп жатканы айтылууда. 

Мурдагы төрага Асылбек Жээнбеков агасы премьер-министрликке көрсөтүлгөндүктөн спикерликтен өз эрки менен кеткен.