БИШКЕК, 7-апр. — Sputnik. Апрель революциясынан жабыркаган 630 жаран мамлекет тарабынан ай сайын төлөнүүчү жөлөк пул алып келет. Бул тууралуу Эмгек жана социалдык өнүгүү министрлигинин маалымат кызматы билдирди.
"Жөлөк пул 2010-жылдагы апрель, май жана июнь окуяларында каза болгондордун жакындары менен үй-бүлөлөрүнө 3 миң 700 сомдон берилип келет", — деп айтылат маалыматта.
Мындан сырткары, мамлекет апрель, май жана июнь окуяларынан жабыркаган жарандарга 869 батир берген. Алардын ичинен 162 батир Апрель революциясынан жабыркаган жарандардын үй-бүлөсүнө берилген.
