БИШКЕК, 7-апр. — Sputnik. Баткен облусунда 7-апрель Элдик революциясында курман болгондорго арналган эскерүү-митинг өткөрүлдү. Бул тууралуу өкмөттүн аталган облустагы өкүлчүлүгүнүн маалымат кызматы билдирди.
Иш-чарага Баткен облусундагы ыйгарым укуктуу өкүл Жеңиш Разаков, Баткен райондук мамлекеттик администрация башчысы аким Кенеш Салихов, Баткен шаарынын мэри Гапар Матказиев, облустук мекеме ишканалардын жетекчилери жана жергиликтүү тургундар катышты.
Митингде апрель окуясында шейит кеткендерди эскерүү күнүнө карата куран окулду.
Иш-чаранын алкагында китеп көргөзмө, Үркүндүн 100 жылдыгына жана Жусуп Баласагындын 1000 жылдыгына карата сүрөт көргөзмөсү уюштурулду.
Эскерте кетсек, Баткен облусунан апрель окуясына 20га жакын жаран катышкан. Алардын ичинен алтоо курман болуп, үчөө жаракат алган.
