БИШКЕК, 28-мар. — Sputnik. Бүгүн мектеп окуучуларынын республикалык олимпиадасы жыйынтыкталып, жеңүүчүлөр сыйлаганын Билим берүү жана илим министрлиги билдирди.
Маалыматка ылайык, олимпиаданын IV этабынын жыйынтыгы менен командалык эсепте биринчи орунду Бишкек шаарынын окуучулары ээлесе, экинчи орунга Ысык-Көл, ал эми үчүнчү орунга Баткен облусунун окуучулары ээ болушту.
Жеңүүчүлөргө I, II, III даражадагы дипломдор, ал эми 4-орунду ээлегендерге ардак грамоталар тапшырылды.
Эскерте кетсек, үстүбүздөгү жылдын 25-26-март күндөрү республикалык олимпиаданын IV этабы өттү. Анда математика, информатика, физика, биология, тарых, кыргыз тили жана адабияты, орус тили жана адабияты, англис тили, география жана химия боюнча мыкты окуучулар аныкталды.
Министрлик аталган иш-чараны өткөрүүгө бир катар жогорку окуу жайлар көмөктөшкөнүн белгилейт.
