БИШКЕК, 24-мар. — Sputnik. "Көлдүк мамонттун" калдыктарын изилдегенге кыргыз окумуштууларынын күчү жетет. Бул тууралуу палеонтолог Айзек Бакиров маалымат жыйында билдирди.
2016-жылы 10-мартта Ак-Суу районундагы Жыргалаң суусунун боюнда жергиликтүү тургундар мамонтко окшош жандыктын азуу тишин тапкан. Аны жеринде изилдөө үчүн окумуштуулардын тобу барып, казуу иштерин жүргүзгөн.
Бакировдун айтымында, көлдөн табылган байыркы жаныбардын сөөгү мамонт болушу мүмкүн.
"Сөөктүн сакталышы начар экен, упаранып түшүп атат. Биз аны Биология институна алып келдик. Ал жактан изилдеп, табылган сөөк кайсыл жаныбардыкы экенин так айта алабыз", — деди ал.
Бакиров бул ишке чет жактан адистер тартылбай турганын баса белгиледи.
1978-жылы Жыргалаң суусунун боюнан курулушчулар мамонттун сөөгүнө күбө болушкан. Азыр анын азуу тиштери Караколдун аймак таануу музейинде сакталып турат. 1980-жылы Талас облусунун Кара-Буура районунун аймагынан да мамонттун азуу тишинин сыныгы табылган.
