БИШКЕК, 22-мар. — Sputnik. Кыргызстан боюнча бардык аэропорттордо күчөтүлгөн режим киргизилди. Бул тууралуу Sputnik Кыргызстан агенттигине "Манас" эл аралык аэропортунун маалымат кызматы билдирди.
Бул кадам бүгүн саат 13.00дө Бельгиянын борбор калаасынын аэропорту менен эки метросунда төрт жардыруу болуп, бир нече бомба табылган соң коопсуздукту сактоо максатында көрүлүүдө.
"Жүргүнчүлөрдү текшерүү күчөтүлөт. Коопсуздук чаралары бекемделет", — деп билдирет маалымат кызмат.
Эске сала кетсек, бүгүн саат түштө Бельгиянын борбор калаасынын аэропорту менен эки метросунда төрт ирет жардыруу болуп, андан каза болгондордун саны 27 кишиге жетти. Дагы 35 адамдын жарадар болгону айтылууда.
Аэропорттон дагы бир нече бомба табылганы белгилүү болду. Өлкө бийлиги жардырууларды расмий түрдө теракт деп тааныды.
Кыргызстандын ТИМи аэропорттогу жардыруудан алдын ала маалыматтар боюнча КР жарандары жабыр тарткан жок деп билдирген.
