БИШКЕК, 22-мар. — Sputnik. Белоруссиядан Кыргызстанга келген түз инвестиция 2015-жылы 40,7 миллион долларды түзүп, мурдагы жылга салыштырмалуу 407 эсеге көп болду. Бул туурасында Улуттук статистика комитенен билдиришти.
Ведомствонун маалыматында, КМШ өлкөлөрүнөн келген инвестиция агымы эки эсеге өскөн. Россиядан келген инвестиция көлөмү 95 пайызга көбөйгөн. Каражаттар негизинен энергетика жана финансы секторуна салынган.
Ал эми КМШ өлкөлөрүнөн сырткары Кыргызстанга келген инвестиция көлөмү азайган. Кытайдан келген агым эки эсеге түшүп кеткен. Кытайлар негизинен Кыргызстандагы кен байлыктарын чалгындоого, курулуш жана кайра иштетүү өнөр жайына кызыккан.
Улуу Британия менен Түркиянын үлүшү төрт эсеге, ал эми АКШныкы 1,2 эсеге өскөн. Улуу Британия тоо кендерин чалгындоого, Түркия курулушка, кайра иштетүү өнөр жайына, ал эми АКШ финансы тармагынагы ортомчулукка жана камсыздандырууга инвестиция салган.
