БИШКЕК, 21-мар. — Sputnik. Премьер-министр Темир Сариев кыргызстандыктарды Нооруз майрамы менен куттуктап, өлкөнүн алдында жасала турган арбын иштер тургандыгын айтты. Бул туурасында өкмөттүн маалымат кызматы билдирди.
Ал жалпы элди жандануу менен жаңылануунун, аруулануу менен тазаруунун, кечиримдүүлүк менен сабырдуулуктун майрамы менен куттуктаган.
"Алдыбызда биз аша турган улуу белдер турат. Ага каруубуз бир колдо, күчүбүз бир билекте чогуу болуп, ынтымактын, биримдиктин туусун бийик көтөрүп, эл-жерибиз, жаркын келечек үчүн талыкпаган эмгек менен бирге баралы", — деп айтылат премьердин куттуктоосунда.
Өкмөт башчысы жарандарды жаратман эмгек аркылуу ɵлкɵнүн жаркын келечегине салым кошууга чакырды.
"Кыргызстаныбыз мындан ары карай да ɵсүп-ɵнүү жолунда болсун! Тилектер орундалсын, үмүттөр акталсын, таттуу кыялдар турмушка ашсын",— деди Сариев.
Буга чейин кыргызстандыктарды Ноорузь майрамы менен президент Алмазбек Атамбаев, парламент спикери Асылбек Жээнбеков куттуктаган.
