Ош шаарынын борборунда өткөн Нооруз майрамына 10 миңден ашуун эл катышты

БИШКЕК, 21-мар. — Sputnik. Ош шаарында Нооруз майрамы калаанын борбордук аянтында салтанаттуу түрдө белгиленип, ага 10 миңден ашуун шаар тургундары жана меймандары катышты. Бул туурасында Ош шаарынын мэриясынын маалымат кызматынан кабарлашты.

Салтанаттуу иш-чарда шаардын борбордук аянтында боз үйлөр тигилип, ар түрдүү улуттардын каада-салттары көрсөтүлдү. Кол өнөрчүлөрдүн буюмдарды, улуттук тамак-аштын түрлөрү, улуттардын жана элдердин каада-салттары, ыр-бийлери тартууланды. 

Аянтта Нооруз майрамынын атрибуттары болгон аластоо, бата берүү салттары көрсөтүлүп, майрамдын катышуучуларына сүмөлөк таратылды.

Салтанатка Ош шаарынын мэри Айтмамат Кадырбаев, өкмөттүн Ош облусу боюча ыйгарым укуктуу өкүлү Таалайбек Сарыбашев, шаардык кеңештин төрагасынын милдетин аткаруучу Арфидин Аланов катышты. Чет элдик дипломатиялык өкүлчүлүктөрдүн — Россиянын, Кытайдын, Казакстандын Ош шаарындагы консулдары катышып, шаардыктарды куттуктады.

Шаар ичиндеги бактар майрам шаанисинде жасалгаланып аянттарда, эс алуу жана сейил бактарда калаа тургундары жана меймандары эс алууда. 

Ноорузга карата Бишкекте өтө турган майрамдык иш-чаралардын программасы менен Sputnik Кыргызстан агенттигинин инфографикасынан көрсөңүз болот>>