БИШКЕК, 21-мар. — Sputnik. Кыргызстандын окумуштуулары "көлдүк мамонттун" азуу тишин баш сөөгү менен казып чыгарышты.
Анын лабораториялык изилдөө иштери Бишкекте жүргүзүлөт, деп сөөктү казуу иштерин жүргүзгөн топтун жетекчиси, тарых илимдеринин кандидаты Кадича Ташбаева Sputnik Кыргызстан маалымат агенттигине билдирди.
Белгилей кетсек, 2016-жылы 10-мартта Ак-Суу районундагы Жыргалаң суусунун боюнда жергиликтүү тургундар мамонтко окшош жандыктын азуу тишин тапкан.
Ташбаеванын айтымында, окумуштуулардын тобу байыркы жаныбардын калдыктарын казуу иштерин бүгүн-эртең аяктайт.
"Лабораториялык анализдерден кийин ал кайсы жаныбарга таандык экенин, канчанчы жылдары жашаганы так билинет. Анализди Бишкектен жасайбыз", — дейт ал.
Топтун мүчөлөрү байыркы жаныбардын сөөгү табылган жердин чеке-белин да изилдеп, анализдерди алып жатканын Ташбаева кошумчалады. Азырынча азуу тиш жана баш сөөгүнөн башка эч нерсе табыла элек.
