Бий таймаш — "Майкл Жексон" vs "Кара жорго"

Жазылуу
Майкл Жексон өз кыймылдарынын айрым элементтерин кыргыздын улуттук кара жорго бийинен алышы мүмкүндүгүн "Кара жорго" тобунун көркөм жетекчиси Кубанычбек Эсенбаев билдирди.

"Кара жорго" менен "Гангам стайл" бийин катыра бийлеген "Кожомкул" робот
"Кара жорго" тобунун бийчилери америкалык атактуу ырчы өз кыймылдарын кыргыздын кара жорго бийинен алганбы деп кызыгып көрүштү. Алар Майкл Жексонду туурап бийлеген бийчи менен достук негизде беттешип көрүүнү чечишти.

Нооруз майрамын утурлай бийчилер борбор калаадагы бош калган имараттын чатырында күч сынашты.

"Кара жорго" тобунун көркөм жетекчиси Кубанычбек Эсенбаев Майкл Жексон менен кара жорго бийи окшош экенин айтат. 

"Менин таанышым Майкл Жексондун эски клиптерин көрүп отуруп, анын кыймылдарында кыргыздын кара жорго улуттук бийинен айрым элементтери бар экенин байкаптыр. Анан эки бийди бийлегендерди беттештирип көрүүнү сунуштады. Биз "Кара жорго" тобунун мүчөлөрү Асел Касмакунова жана Элмурат Майрамбеков менен идеяны колдодук", — дейт Эсенбаев.

Бий таймашта Майкл Жексонду туураган Кыргызстандагы атактуу бийчи Сергей Зеленовский бийледи.

"Кара жорго менен Майкл Жексондун кыймылдарында окшоштуктар бар. Өзгөчө ийиндердин кыймылдарын айтсак болот. Ошондой эле колдордун кыймылдашы да аябай окшош", — дейт Зеленовский.

Жолдоштук беттеш аяктаган соң бийчилер кийин да жолугуп, жакын арада дагы бийлей турганын билдиришти. 

Жаңылыктар түрмөгү
0