БИШКЕК, 18-мар. — Sputnik. Кыргызстандык режиссер Актан Арым Кубаттын "Кентавр" тасмасынын дүйнөлүк прокаты менен Европанын The Match Factory компаниясы алектене турганын Кинематографты өнүктүрүү фондусунун өкүлү Алтынай Койчуманова билдирди.
Маалыматка ылайык, The Match Factory учурда тартылып жаткан "Кентавр" тасмасын жайылтуу укугун сатып алган. Аталган компания тасманы эл аралык кинофестивалдарда тартуулап, прокатын камсыздайт. Мындан тышкары, тасманы теледен берүү, DVD-дискин чыгаруу, Интернет тармагында сатуу иштерин жүргүзүүнү өзүнө алган.
"Тасманын акыркы иштери учурда Германияда жасалып жатат. Анын музыкасы менен немис композитору Андре Маттиас иштөөдө. Кыргызстанда тартылган тасманын монтажы Сербияда жасалды", — деди Койчуманова.
"Кентавр" долбоорун ишке ашырууга Кыргызстандан тышкары Франция, Германия, Нидерланддар жана Япония мамлекеттери катышкан.
Фильмде Актан Арым Кубат башкы ролду ойнойт. Мындан тышкары, тасмага Болот Тентимишов, Таалайкан Абасова, Зарема Асаналиева, Илим Калмуратов тартылган.
