БИШКЕК, 11-мар. — Sputnik. Жогорку Кеңештин мурдагы төрагасы Ахматбек Келдибеков сот отурумунда акыркы сөзүн сүйлөп, сот адилет чечим чыгарарына ишеним артты.
"Бардык документтер менин күнөөсүз экенимди далилдеди", — деди айыпталуучу.
Учурда Бишкек шаардык сотунда Келдибековдун иши каралып, сот чечим кабыл алуу үчүн танапис жарыялады.
Ишти соттор Бекболот Жаналиев, Кайсын Абакиров жана Ирина Воронцовалар карашууда.
Келдибеков 2002-2005-жылдары Социалдык фонддун төрагасы болуп турганда жана 2008-2009-жылы Салык кызматын башкарган убагында коррупцияга барган жана ЖКнын спикери кезинде кызматтык абалынан кыянаттык менен пайдаланган деп айыпталууда.
Ага Кылмыш жаза кодексинин 30-беренесинин төртүнчү бөлүгү (кылмышка шериктеш болуу), 303-беренесини биринчи бөлүгү (коррупция), 304-беренесинин төртүнчү бөлүгү (кызматтык абалынан кыянаттык менен пайдалануу) боюнча кылмыш иши козголгон.
Келдибеков жогорудагы айыптар менен 2013-жылы камакка алынган. Биринчи май райондук соту Келдибековду коррупция беренеси боюнча актап, ал эми Москвадагы өкүлчүлүктү ачуу боюнча үч миллион сом айып пул салган.
