БИШКЕК, 7-мар. — Sputnik. Кыргыздын кыраан кыз-келиндери улут тагдырына тете маселелерди чечүүгө катышып келген. Бул тууралуу президент Алмазбек Атамбаев 8-март майрамын утурлай айымдарга арналган куттуктоосунда билдирди.
Өлкө башчы өз сөзүндө балдарын мээримге бөлөп, бөпөлөп өстүргөн энелерге, үй-бүлөнүн очогун өчүрбөй сактап да, жаны тынбай эмгектенген аялдарга канча таазим кылсак да аздык кыларын белгилеген.
"Жаздын жарчысы болуп келип, таңкы желаргыдай көңүл сергиткен бул касиеттүү күн аялзатынын бактысына жазылган. Карт тарыхта далай согуштар менен жокчулуктардын азабын тартса да, улут тукумун улап, жарыкчылыкка балдарды жаратып жана эрезеге жеткирип келген апаларыбызга өзгөчө урмат жана даңк", — деп айтылат куттуктоодо.
Президент талыкпас эмгеги, ар кандай турмуштук кырдаалда сабырдуулугу, чыдамкайлыгы жана акылгөйлүгү менен бүт үй-бүлөгө, мамлекетке бейпилдик менен аруулук алып келген аялдар өзгөчө урматка арзый турганын белгилеген.
"Бардык мезгилдерде кыргыздын кыраан кыз-келиндери эркектер менен кошо Мекенин коргошкон, улут тагдырына тете маселелерди чечүүгө катышкан. Өлкөбүздө азыркы тынчтыктын жана ынтымактын өкүм сүрүшүндө, мамлекет пайдубалын чыңдоодо сиздердин эмгекке баа жетпейт. Үй-бүлөнүн очогу дайыма жанып, мээримге бөлөнүп турганы үчүн сиздерге миң мертебе ыраазыбыз. Сиздер болгон үчүн дүнүйөбүз жарык, көңүлүбүз шат, пейилибиз жоомарт ", — дейт Атамбаев.
Президент айымдардын ишине ийгилик, бекем ден соолук, узак өмүр жана үй-бүлөлүк бакыт каалады.
