БИШКЕК, 4-мар. — Sputnik. Былтыр Кыргызстанга салык акысы төлөнбөстөн 200 миң тонна күйүүчү май киргизилгенин маалымат жыйында Экономика министрлигинин өкүлү Таалайбек Бекташев билдирди.
Анын айтымында, ЕАЭБ курамына кирүү менен Кыргызстанга декларацияланбаган товарлардын агымы кескин көбөйгөн. Мындай товарлар өлкө аймагына салык акысы төлөнбөстөн же баа төмөндөгөндө киргизилген. Финансы полициясы күйүүчү майдын мыйзамсыз жүгүртүлгөн 41 фактысын аныктап, анын жалпы көлөмү бир миң тоннага жеткен.
"Эгер 2014-жылдагы күйүүчү майдын импорт көлөмү менен салыштырсак, былтыркы жылдын көрсөткүчү 165 миң тоннага азайганын ачыктайт. Жыл сайын күйүүчү майга болгон муктаждыктын өсүп жатканын белгилесек, 200 миң тонна май салык акысыз келген", — деди ал.
Министрликтин өкүлү мындай көйгөй учуру ун, кумшекер жана жыгач материалдарын киргизүүдө да бар экенин белгилейт.
Мамлекеттик салык кызматынын жетекчи орун басары Октябрь Абдыкаимовдун айтымында, салыктан баш тартуудан улам кирешенин көлөмү азаюуда. Алсак, ай сайын кошумча нарк салыгынан 1,7 миллиард сом түшсө, учурда 1,3-1,5 миллиарддын чегинде экени белгиленди.
