БИШКЕК, 4-мар. — Sputnik. Комиссиянын чечими менен "Кумтөрдө" каза болгон жарандын үй-бүлөсүнө төлөнүүчү компенсация 20 пайызга кыскара турган болду. Бул тууралуу Sputnik Кыргызстан маалымат агенттигине комиссиянын төрайымы Чынара Татыгулова билдирди.
Эске салсак, 25-январда "Кумтөр" кенинде кокустуктун айынан бир жумушчу каза болуп, артында жубайы менен 10 баласы калган.
Комиссиянын чыгарган тыянагы боюнча кырсыкка маркумдун 20 пайыз күнөөсү бар экени тастыкталганын комиссиянын төрайымы айтып берди.
"Кокустуктун айынан каза болгон "Кумтөр" кызматкери коопсуздук эрежелерин толук сактабаганы аныкталды. Ал иштеп жаткан конвейерди айланып өтпөстөн, астынан өтүүгө аракет жасаган. Жыйынтыгында колу роликтин астына кирип кетип, ошол жакта калып калган. Ал эми конвейер иштей берген", — дейт Татыгулова.
Анын айтуусунда, чыгарылган чечим "Кумтөр" ишканасы менен маркумдун үй-бүлөсүнө жөнөтүлөт. Анын негизинде жоготууга учураган тарап, ишканага арыз менен кайрылып тийиштүү компенсация ченемин банк аркылуу котортуп алса болот.
Татыгулованын айтуусу боюнча, азыркы чечимге ылайык, "Кумтөр" Социалдык фондго берилүүчү каражаттан 20 пайыз кемитет.
Ал эми Эмгек кодексине ылайык, маркумдун 20 жылдык маянасы анын үй-бүлөсүнө эч кандай кыскартуусуз төлөнүп берилет. Төлөнүүчү каражаттын суммасы коммерциялык сыр экендигин төрайым кошумчалады.
