БИШКЕК, 3-мар. — Sputnik. Өлкө башчы Алмазбек Атамбаев Россия президенти Владимир Путин менен кечээ, 2-мартта Москва шаарында жолукту.Тараптар эки өлкөнүн соода-экономикалык маселелерин талкуулашты.
“Биз буга чейин сүйлөшкөн эки өлкө ортосундагы соода-экономикалык маселелерди чечип, чогу иш алып барууну улантабыз”, — деди Путин.
Анын айтымында Россия Кыргызстандын башкы соода-экономикалык өнөктөшү болуп саналат.
“Кыргызстандын ЕАЭБке кирүүсү менен эки өлкөнүн кызматташуусуна жаңы мүмкүнчүлүктөр ачылды. Экономикалык көрсөткүчтөр кагаз бетинде гана эмес, карапайым калктын жашоо шартында да жакшырышы керек”, — деди Путин.
Өз кезегинде Алмазбек Атамбаев Россия президенти менен актуалдуу маселелерди сүйлөшүүгө мүмкүнчүлү болгонуна кубанычын билдирди.
“Биз бир гана соода-экономкалык эмес, стратегиялык өнөктөшпүз. Мен бул достуктун келечеги кең деп ишенем”, — деди Атамбаев.
Жолугушууга Россия тараптан Россиянын Тышкы иштер министри Сергей Лавров, Каржы министри Антон Силуанов, Энергетика министри Александр Новак жана Федералдык бажы кызматынын жетекчиси Андрей Бельянинов катышты.
