БИШКЕК, 2-мар. — Sputnik. Кыргызстандын "Ак Илбирс" улуттук киносыйлыгына катышуу үчүн арыздарды кабыл алуу башталганын Кинематографты колдоо фондусу билдирди.
Маалыматка ылайык, сыйлыкка 2015-жылы өндүрүштөн чыккан ар кыл жанрдагы тасмалар көрсөтүлө алат. Мындан төрт жыл мурун негизделген иш-чара 14 номинация боюнча мыктыларды аныктап келсе, былтыртан баштап Борбордук Азияны толугу менен камтып, ага дагы эки номинация кошулган.
Арыздар 31-мартка чейин кабыл алынып, сыйлык тапшыруу аземи үстүбүздөгү жылдын 15-майында "Манас" кинотеатрында өтөт.
Киносыйлык "Айтыш" коомдук фондусу, Кино өнүктүрүү фонду, Кинематография департаменти тарабынан уюштурулуп келет.
