БИШКЕК, 26-фев. — Sputnik. Автоунааларды каттоодо жана кайра каттоодо алынчу төлөмдөр төмөндөтүлгөнү тууралуу маалымат Жогорку Кеңештин маалымат кызматы Транспорттук каражаттарды жана айдоочулук курамды каттоо департаментинин директорунун орун басары Үсөйүн Касмалиевге таянуу менен билдирди.
Маалыматка ылайык, үстүбүздөгү жылдын 22-февралынан тарта автоунааларды каттоо, кайра каттоодо алынчу беш жана бир пайыздык төлөмдөр боюнча жаңы тарифтер иштей баштаган.
Мында көбүнчө 2005-жана андан ылдыйкы жылдары чыгарылган унаалар каттоо, кайра каттоодон өтүүдө белгиленген тарифтик бааларды эки-үч эсеге чейин арзаныраак төлөй башташат.
"Буга унаа базарларындагы жүргүзүлгөн аналитикалык изилдөөлөр, унаалардын наркынын түшүшү, кардарлардын унааларды каттатууга караганда ишеним кат менен жүрүүгө көбүрөөк ыктай баштагандыгы себеп болду", — деп айтылат билдирүүдө.
Эгер 2005-жылга чейин чыккан кыймылдаткыч күчү 1,5-2 кубдук унаалар 11 миң сом төлөп келсе, азыр бул сумма монополияга каршы агенттик менен макулдашылган тарифтик торчого ылайык болгону 3,5 миң сом гана төлөп катталат.
Ошондой эле тарифтик торчодо унаалардын кайсы мамлекетте өндүрүлгөнү так көрсөтүлөт. Ошондуктан КМШ аймагынан жана Европадан келген унаалардын каттоо ишинде бири-биринен айырмаланган тарифтик баасы аныкталган.
