БИШКЕК, 23-фев. — Sputnik. Тышкы иштер министрлиги чет жакта жүргөн кыргызстандыктардын кызыкчылыгын көздөй турган мекемелердин ишине олуттуу көңүл бөлөт. Бул тууралуу министрликтик статс-катчысы Данияр Сыдыков Алматы шаарындагы кыргыз диаспорасы менен жолугушуу учурунда билдирди.
Жолугушууда консулдуктун кыргыз диаспорасы менен болгон өз ара мамилеси талкууланып, негизинен мигранттар туш болгон көйгөйлөр, маданий иш-чаралардын жандануусу, Кыргызстандын ЕАЭБге киргенден кийинки абалы тууралуу түшүндүрүү иштерин жүргүзүү маселелери ортого салынды.
Сыдыков жакын арада ТИМ Алматыдагы Башкы консулдуктун ишин текшерүү үчүн атайы түзүлгөн комиссияны жибере турганын, аталган мекеме ишинин натыйжалуулугун арттыруу максатында кыргызстандык мигранттар менен жолугушуулар пландаштырылганын маалымдады.
