БИШКЕК, 23-фев. — Sputnik. Бүгүн тынчтыктын баасы, баркы болуп көрбөгөндөй артып, ал үчүн жоопкерчилик ар бирибиздин мойнубузда. Бул тууралуу премьер-министр Темир Сариев мекен сакчыларына карата куттуктоосунда билдирди.
Өкмөт башчынын айтымында, бул — мекенди сүйүүнүн, баатырлыктын жана эр жүрөктүүлүктүн майрамы.
"Эзелтеден элибиз Ата Мекенди коргоону ыйык милдет катары көрүп келгенин айтты, эр жигит Ата Журттун ишенген тиреги, эң кыйын сыноолордо майтарылбас кайраттуулуктун, каармандыктын үлгүсү болгон. Ушул ыйык салтты улап, бүгүн да өлкөбүздүн коопсуздугун көздүн карегиндей сактоо милдети ар бирибизге жүктөлгөн", — деп айтылат куттуктоодо.
Сариев коопсуздук эң башкы маселеге айланган заманда өлкөнүн тынчтыгы, чек аранын бекемдиги жана жарандардын коопсуздугу өзгөчө мааниге ээ экенин баса белгиледи.
"Бүгүн тынчтыктын баасы, баркы болуп көрбөгөндөй артып, ал үчүн жоопкерчилик ар бирибиздин мойнубузда экени экенин түшүнүүдөбүз", — деди премьер-министр.
Өкмөт Куралдуу күчтөрдүн абалын чыңдоого жана жакшыртууга бардык аракетин көрүп жатканын белгилеген өкмөт башчы жыл өткөн сайын күжүрмөн даярдыгын жана материалдык-техникалык базасын чыңдап, Кыргызстанды коргоого жөндөмдүүлүгүн күчөтүп жатканын кошумчалады.
"Учурда Мекенди коргоо, туулган жериңдин кызыкчылыгын коргоо үчүн колубузга курал кармап чек арада гана турбастан, кайсы тармак болбосун ак эмгек, ак ниеттүү ишибиз менен өлкөбүздүн коопсуздугун чыңдоо жана туруктуулугун сактоого мүмкүнчүлүгүбүз бар", — деди Сариев.
Премьер-министр Ата Мекен коргоочуларынын күнү менен куттуктап, чың ден-соолук, бакыт-таалай, келечекке зор ишеним, Мекенибизге тынчтык, бейпилдик жана туруктуу өнүгүүнү каалады.
