Сариев баштаган өкмөт мүчөлөрү Балыкчы шаарындагы аскер бөлүгүндө КРдин Куралдуу күчтөрүнүн резервдик түзүмдөрүнүн аскердик машыгууларына күбө болду. Бул туурасында өкмөттүн маалымат кызматы кабарлады.
Машыгуулар Балыкчы шаарындагы №20636 аскер бөлүгүндө куралдуу күчтөрдүн Башкы штабы тарабынан Шанхай кызматташтык уюмунун "Тынчтык Миссиясы-2016" антитеррордук окууларынын алкагында өткөрүлүүдө.
Темир Сариев машыгуулардын жүрүшүндө БМП айдап, иш-чаранын маанилүүлүгүн белгиледи.
"Армиябыз күчтүү болсо мамлекетибиз кубаттуу болот. Коопсуздукту бекем сактоо үчүн аскердик даярдыкты жогорку деңгээлде көрсөтүү керек", — деди Сариев.
Премьер-министр учурда негизги милдет аскерлердин күжүрмөн даярдыгына өзгөчө көңүл буруу менен татыктуу деңгээлде кармоо зарылдыгын белгиледи.
