БИШКЕК, 18-фев. — Sputnik. Казакстандын Жамбыл облусунда каза болгон тестиердин өлүмү боюнча чоң жаңжал чыгып кете жаздады.
Tengrinews.kz сайты кабарлагандай, Казакстандын Жамбыл облустук ички иштер департаменти 2016-жылдын 15-февралында Жамбыл облусуна караштуу Бурыл айылында Дюйсенбек А.С.аттуу жаш баланын сөөгүн табышкан. Каргашалуу күнү кылмышкер үйдү тоноо үчүн барып, кичинекей баланы өлтүргөн.
"Адам өлтүрүү фактысы үйдү тоноо кылмышы менен коштолгону такталды", — деп билдирет жергиликтүү полиция.
Казакстанда жашаган жергиликтүү түрк улутунун аксакалдары каза болгон баланын үй-бүлөсүнөн кечирим сурап, кылмышкерди жазалоо керектигин билдирди. Мындан сырткары, кылмышкердин турак жайын каза болгон өспүрүмдүн үй-бүлөсүнө өткөрүп берүү чечимине келишкен.
Ал учурда Казакстандын Ички иштер министри Калмуханбет Касымов бул окуя боюнча абал туруктуу экенин билдирди.
"Диаспоралардын жетекчилери жана жергиликтүү бийлик өкүлдөрү түшүндүрүү иштерин жүргүзүштү. Биздин Улуттук гвардия күчөтүлгөн абалда иштөөдө. Бул иш боюнча тергөө көпкө созулбаш керек. Окуя улуттар ортосундагы ынтымакка бүлөк салбайт", — дейт министр.
Ал кошумчалагандай Улуттук гвардиянын аскерлери эки күндүн ичинде күчөтүлгөн кызматын токтотот.
Өлкөдөгү түрк диаспорасы каза болгон жаш баланын жерге берүү зыйнатына кеткен чыгымдарды төлөп бермей болушту.
