БИШКЕК, 17-фев. — Sputnik. Кыргызстанда биринчи жолу балдарга өпкөнүн сезгениши жана мээ кабыгынын оорушуна каршы эмдөө жасалат. Бул туурасында Бишкек шаарынын санитардык-эпидемиологиялык көзөмөл борборунун башкы дарыгери Артур Буяклянов билдирди.
Анын айтымында, аталган ооруларга каршы эмдөө Бүткүл дүйнөлүк саламаттыкты сактоо уюмунун сунушу менен жылнаамага киргизилип жатат.
"Балдарга эмдөө үч ирет жасалат. Азыр адистер атайы окуудан отүп, вакцинаны жайылтуу жана эмдөө тууралуу маалымат алып жатышат", — деди Буяклянов.
Адис белгилеп өткөндөй, Превенар-13 вакцинасы клиникалык текшерүүдөн өттү. Балдарды аталган илдеттерден бул вакцина башкаларга салыштырмалуу жакшы сактай алат.
Ал эми Бишкек шаардык иммунопрофилактика борборунун жетекчиси Бурул Асыкбекова маалымдагандай, 22-марттан баштап бир жашка чейинки наристелерди эмдөө башталат.
"22-мартка дейре тийиштүү адистер аймактарды кыдырып вакцинанын таратуу менен алектенет. Республикалык иммунология борбору вакциналарды дайындап койду", — дейт Асыкбекова.
Менингит же мээнин чел кабыгынын сезгенүүсү — жугуштуу оорулардын бири. Бул илдет көбүнчө аба аркылуу жугуп, балдардын арасында көп кездешет.
