БИШКЕК, 16-фев. — Sputnik. Кыргызстандын жарандары кандай билим алып жатканын Мамлекеттик статистика комитети изилдеп көрдү.
Өлкөдөгү жогорку окуу жайларын жана техникумдарды эркектерге караганда аялдар көп бүтүргөн. Мекеменин маалыматына ылайык, жүз айымдын ичинен 13ү жогору билимге ээ. Мырзалардын саны азыраак, он бирди гана түзөт.
Ал эми кыздарга салыштырмалуу эркектердин көбү мектепти аякташат. 100 эркектин ичинен 62си орто билим алып чыкса, айымдардын арасында бул көрсөткүч 55 пайызды гана түзөт.
Ошондой эле башталгыч класска барбагандар да бар. Мындай көрсөткүч эркектер арасында жүздүн ичинен бирөө болсо, аялдар арасында экини түзөт.
Ал эми калктын бир пайызынын кат-сабаты таптакыр жоюлган эмес. 70 пайыз сабатсыз адамдардын катарын 55 жаштан жогоркулар толуктайт. Анын көпчүлүгүн аялдар түзөрүн Мамлекеттик статистика комитети белгилейт.
