БИШКЕК, 14-фев. – Sputnik. Дыйкандарга күйүүчү май эки сомго чейин төмөнкү баада сатыла баштады. Бул тууралуу Sputnik Кыргызстан агенттигине Нефтетрейдерлер ассоциациясынын жетекчиси Улан Кулов билдирди.
"Февраль айынан майга чейин дыйкандарга дизелдик май менен АИ-80 үлгүсүндөгү бензин рыноктук баага салыштырмалуу эки сомго чейин төмөнкү баада сатыла баштады", – дейт Кулов.
Айыл чарба министрлигинен билдиришкендей, жазгы айдап-себүү иштерине жалпы 40 миң 500 тонна күйүүчү май керектелет. Кыргыз нефтетрейдерлер ассоциациясы менен түзүлгөн келишим боюнча керектелген күйүүчү май дыйкандарга "Газпром Кыргызстан" ишканасы тарабынан жетиштүү көлөмдө сатыкка ыгарылат.
Ал эми азыртан тарта күйүүчү май алууну көздөгөн дыйкандар жергиликтүү Айыл өкмөткө барып маалым кат алуулары керек.
