БИШКЕК, 13-фев. — Sputnik. Кыргызстандык жаран Марат Исаев темир жолго жыгылып кеткен москвалык Юлия Валь аттуу аялды куткарып калганын "Московский комсомолец" гезити жазып чыкты.
Маалыматка ылайык, 28 жаштагы Исаев темир жолго секирип түшүп, жыгылып калган аялды перронго алып чыгууга аракет кылып жаткан полиция кызматкерине жардам берген. "Красносельская" метросунун станциясында турган аялдын талмасы кармап жыгылып кеткен. Дене-боюн калтырак баскан аялды көтөрүп тургузууга мүмкүн болгон менен келе жаткан поезд баарынын жашоосуна коркунуч жараткан.
Кыргызстандыктын айтымында, ал Москвадагы фирмалардын биринде курьер болуп иштейт. 11-февраль күнү жумуштан келе жатып перрондон кулап түшкөн аялды көргөн.
"Биринчи болуп полиция кызматкери жардамга умтулду. Артынан мен түштүм. Бирок аялды дароо алып чыга алган жокпуз, анткени поезд келе жаткан. Полиция кызматкери баарыбызга рельстердин ортосуна жатууну буйрук кылды. Ал келип токтомоюнча кыймылдабай жаттык", — дейт Исаев.
Окуядан кийин программист болуп иштеген Юлия Валь Склифосовский атындагы ооруканага баш мээси чайкалып жеткирилген. Полиция бөлүмү аялды куткарууга шашылган кызматкер сыйлыкка көрсөтүлө турганын билдирди.
Ал эми кыргызстандык жаран иштеген мекеме Исаевди сыйлоо боюнча маселени чечип жатканы белгилүү болду.
