БИШКЕК, 10-фев. — Sputnik. Карышкырлардын биологиялык жана байырлаган жерине жараша ар кандай диалектиде уулуй тургандыгын окумуштуулар аныкташты. Бул тууралуу Behavioral Processes журналы жарыялаганын РИА Новости жазып чыкты.
"Карышкырлардын бири-бири менен байланышуусу адамдарга кыйла эле окшош. Так ушул себептен иттерди өзүбүзгө көндүрө алдык, себеби алардын дагы табияты адамдарга окшошуп кетет. Мындан улам булардын бири-бири менен байланышуусун изилдөө менен адамдын сүйлөө жөндөмдүүлүгүнүн келип чыгышын билсе болот", — деп билдирет Арик Кершенбаум аттуу окумуштуу.
Окумуштуулар карышкырлардын алты миңге жакын уулуган аудиосун атайын компьютердик алгоритмге салып изилдешкен. Жыйынтыгында үндөрдөн ар кандай акустикалык элементтер байкалган.
Эгер делфиндердин үнүн 30 эсеге жайлата турган болсо, карышкырлардын уулуганына абдан окшош экени дагы аныкталганы маалыматта белгиленет.
Окумуштуулар жаныбарлардын байланыш тилин изилдөө адамдардын сүйлөө жөндөмдүүлүгүнүн келип чыгышын аныктоого шарт түзөөрүн айтат.
