БИШКЕК, 9-фев. — Sputnik. Ысык-Көлдөгү Ак-Суу районунун ички иштер башкармалыгынын кызматкерлерине карата кылмыш иши козголгонун УКМК билдирди.
Маалыматка ылайык, милиционерлер жергиликтүү тургундун мойнуна күнөө тагып, аны камоо жана кылмыш жоопкерчилигине тартуу опузасы менен 50 миң сом талап кылышкан. Акча каражатынын жоктугунан улам топозун сойдурууга мажбурлап, этин алып кетишкен.
Бул факт боюнча УКМКнын Коррупцияга каршы кызматынын материалдарынын негизинде Ак-Суу райондук прокуратурасы Кылмыш жаза кодексинини 304-беренеси (Кызмат абалынан кыянаттык менен пайдалануу) жана 305-беренеси боюнча (Кызматтык ыйгарым укуктардан аша чабуу) кылмыш ишин козгоду.
Азыркы маалда тергөө амалдары жүрүп жатканы белгилүү болду.
