БИШКЕК, 8-фев. — Sputnik. Тарых жана маданият жылына карата Кыргызстанда театрлар таймашы өтө турганын Маданият, маалымат жана туризм министрлиги билдирди.
Иш-чара үстүбүздөгү жылдын 27-февралына белгиленген. Театрлардын маанисин жана коюлуп жаткан чыгармалардын сапатын жакшыртуу максатында өткөрүлүп жаткан таймашты Бакен Кыдыкеева атындагы Мамлекеттик жаш көрүүчүлөр театрынын жетекчиси Эгемберди Чалабаев демилгелеп, долбоорду иштеп чыккан.
"Мелдешке Кыргызстандагы театрлардын баарынын катышууга укугу бар. Катышуучулар драма, трагедия жана комедия жанрында 10 мүнөттүк үч чыгарма даярдашы зарыл", — деп айтылат билдирүүдө.
Беттешүүчү театрлар чүчү кулак кармоо менен аныкталат. Таймашты 10 кишиден турган калыстар тобу баалайт.
Кыргыз улуттук академиялык драма театрда болуучу алгачкы таймашта Кыдыкеева атындагы Мамлекеттик жаш көрүүчүлөр театры менен Мамлекеттик "Учур" жаштар театры беттешет. Иш-чара саат 18.00дө башталат.
