БИШКЕК, 4-фев. — Sputnik. Унаа ээлеринин жоопкерчилигин сөзсүз камсыздандыруу (УЭЖСМ — ОСАГО) системасы андан өтүүгө баш тарткан айдоочуларга айып пул төлөтмөйүн иштебей турганын "Камсыздандыруучулардын ассоциациясы" юридикалык жактардын бирикмесинин президенти Асел Жамансариева билдирди.
УЭЖСМ боюнча мыйзам үстүбүздөгү жылдын 7-февралында ишке кириши керек. Бирок андан баш тарткандарга айып салууну өкмөт 2018-жылга жылдырды. Полистин баасы үч миң сомго бааланса, камсыздоо төлөмү 550 миң сомдун тегерегинде белгиленген.
"Камсыздандыруу механизми өкмөттүн токтому менен жөнгө салынышы керек. Бирок ал биздин колго тие элек. Андыктан аталган мыйзам 7-февралдан баштап иштей баштайт деген туура эмес. Жоопкерчилик (айып пул) каралбаса, бул мыйзам бир да өлкөдө иштебейт, демек биз да төлөм төлөп бере албайбыз", — деди Жамансариева.
"Росстрах-Кыргызстан" ишканасынын башкы директорунун кеңешчиси Олег Морозов УЭЖСМ системасы жол эрежелерине жана административдик кодекске өзгөртүү киргизгенден кийин толук кандуу иштей турганын белгиледи.
Ал өткөн жылы жол кырсыгынан жабыркап камсыздандыруудан өткөндөргө 65 миллион сом төлөнүп берилгенин, эми мындай көлөмдөгү каражатты кайдан табуу керек деген маселе туулуп жатканын кошумчалады.
