Каракол шаарынын 57 жаштагы тургуну Гүлжан Моңголонова да бул жерден сунушталган жумуштарга чыгып иштеп, акча табат. Алар жумуш табуу үчүн чогулган жайды "офис" деп аташат.
"Ар күнү эле жумуш болуп калса экен дейбиз. Аялзатына той-топур болгондо идиш жууган, же тамак даярдаганга буйуртма алабыз. А негизгиси – кечинде үйгө куру кол барбоо аракети",— дейт Моңголонова.
Моңголонованы кейиткен ал-күчкө толуп турган жаштардын иш таба албай карайлаганы экен.
"Нан заводу ачылса, же тигүү цехтери ачылса, жакшы болот эле. Жаш кыздар-балдардын жумуштан көзү өтүп турганын көрүп жүрөгүң канайт", — дейт ал.
Кычыраган суукка карабай жумушчу жалдаганга келгендердин автоунаасын тороп, өздөрүн мыкты жумушчу катары сунушташат. "Офистегилердин" иши жаз-күз айларында күч алат. Ал маалда талаачылык жумуштары чыгып, көбүрөөк акча таап калышат.
